Judg 15 | NdeIBE | STEP | Muva, ngesikhathi sokuvuna ingqoloyi, uSamsoni wathatha izinyane lembuzi wethekelela umkakhe. Wathi, “Ngiya endlini yomkami.” Kodwa uyisezala wamalela ukuba angene.

Judges 15

Ukuphindisela kukaSamsoni kumaFilisti

1 Muva, ngesikhathi sokuvuna ingqoloyi, uSamsoni wathatha izinyane lembuzi wethekelela umkakhe. Wathi, “Ngiya endlini yomkami.” Kodwa uyisezala wamalela ukuba angene.

2 Wathi, “Ngangileqiniso ukuthi wawusumzonda kakhulu ngasengimendisela kumngane wakho. Umnawakhe kamuhle na? Thatha yena.”

3 USamsoni wathi kubo, “Khathesi ngilelungelo lokuphindisela okubi kumaFilisti. Ngizawalimaza impela.” 4 Ngakho wasuka wabamba amakhanka angamakhulu amathathu wawabophanisa imisila ngamabili. Wasebophela uluthi lomlilo emisileni yonke ngamibili, 5 walumathisa izinti zomlilo wawayekela amakhanka angena emabeleni amiyo amaFilisti. Watshisa izinqumbi lamabele amiyo, lezivini kanye lezivande zama-oliva.

6 Kwathi amaFilisti ebuza esithi, “Ngubani owenze lokhu na?” atshelwa ukuthi, “NguSamsoni, umkhwenyana womThimina ngoba umkakhe wendiselwa kumngane wakhe.” Ngakho amaFilisti ahamba ayamtshisa umfazi kanye loyise, bafa.

7 USamsoni wathi kubo, “Njengoba selenze lokhu, angiyikukhawula engikwenzayo ngize ngiphindisele kini.” 8 Wabahlasela kakubi wabulala abanengi babo. Emva kwalokho wahamba wayahlala ebhalwini edwaleni lase-Ethami.

9 AmaFilisti ahamba ayamisa koJuda, asabalala eduze leLehi. 10 Abantu bakoJuda babuza bathi, “Lizesihlaselelani na?” Bona baphendula bathi, “Silande ukuzabopha uSamsoni, senze kuye lokhu akwenzayo kithi.”

11 Abantu bakoJuda abayizinkulungwane ezintathu baya ebhalwini edwaleni lase-Ethami bathi kuSamsoni, “Kawazi yini ukuthi amaFilisti ayasibusa? Wenzeni kithi na?” Waphendula wathi, “Ngimane ngenza kuwo lokho akwenzayo kimi.”

12 Bathi kuye, “Thina silande ukuzakubopha sikunikele kumaFilisti.” USamsoni wathi, “Fungani kimi ukuthi kaliyikungibulala lina ngokwenu.”

13 Baphendula bathi, “Siyavuma. Thina sizakubopha nje kuphela besesikunikela kuwo. Kasiyikukubulala.” Ngakho bambopha ngemichilo emibili emitsha basebesuka laye edwaleni. 14 Esebanga eLehi, amaFilisti amhlangabeza eklabalala. UMoya kaNkulunkulu wehlela phezu kwakhe ngamandla. Imichilo ezingalweni zakhe yaba njengesikusha esitshileyo, izibopho zawa ezandleni zakhe.

15 Esethole ithambo elitsha elomhlathi kababhemi, walithatha wabulala ngalo abantu abayinkulungwane.

16 USamsoni wasesithi, “Ngethambo lomhlathi kababhemi, ngibenze baba ngobabhemi. ngethambo lomhlathi kababhemi. ngibulele amadoda ayinkulungwane.”

17 Eseqedile ukukhuluma walilahla ithambo lomhlathi; indawo leyo yasithiwa yiRamathi Lehi.

18 Ngenxa yokuthi wayesome kakhulu, wakhala kuJehova wathi, “Uyiphile inceku yakho lokhukunqoba okukhulu. Pho sekumele ngibulawe yikoma yini njalo ngiwele ezandleni zabangasokanga na?” 19 UJehova wasevula indawo engumwolo eLehi, kwaphuma amanzi kuwo. USamsoni esenathile, amandla akhe abuya wasevuseleleka. Ngakho umthombo lowo wathiwa yi-Eni Hakhore, njalo ulokhu ukhona eLehi.

20 USamsoni wakhokhela u-Israyeli iminyaka engamatshumi amabili ngesikhathi samaFilisti.